प्रदेश नम्बर २ मा महन्थ ठाकुरले सम्धी उमाकान्त झालाई मुख्यमन्त्री सिफारिस गरेपछि उपेन्द्र यादव असन्तुष्ट, सहकार्य टुट्न सक्ने

  •  
  •  
  •  
  •  
  •  

काठमाडौं, ३० पुस । प्रदेश र प्रतिनिधिसभा निर्वाचनमा प्रदेश नम्बर २ मा राजपा र संघीय समाजवादी फोरम मिलेर लडेका थिए । जसका कारण दुवै दलले सो प्रदेशमा १९ सिट जितेका थिए । प्रदेश सभामा पनि दुवै दलले बहुमत ल्याएका छन् ।

प्रदेश सरकार निर्माणका लागि पनि दुवै दल मिलेर जाने सहमति गरेका थिए । निकट भविष्यमै दुवै दलबीच एकता हुने बताइएको थियो । तर, प्रदेश प्रमुखको विषयलाई लिएर राजपा र संघीय समाजवादी फोरमबीच लफडा सुरु भएको छ ।

राजपा अध्यक्ष महन्थ ठाकुरले पूर्वसचिव एवं सम्धी उमाकान्त झालाई प्रदेश प्रमुख नियुक्त गर्न प्रधानमन्त्री शेरबहादुर देउवालाई सिफारिस गरेपछि फोरम अध्यक्ष उपेन्द्र यादव असन्तुष्ट भएका छन् । प्रदेशसभामा आफ्नो पार्टीले बढी सांसद जितेको भन्दै प्रदेश प्रमुख आफूले सिफारिस गरेको व्यक्ति हुनुपर्ने यादवको दाबी छ । यादवले पनि पूर्वसचिव रत्नेश्वर कायस्थलाई प्रदेश प्रमुखमा सिफारिस गरेको बताइएको छ ।

अब बस्ने मन्त्रिपरिषद् बैठकले प्रदेश प्रमुख नियुक्ति गर्ने बताइएको छ । सकभर दलीय सहमतिमै प्रदेश प्रमुख तोक्ने प्रधानमन्त्री देउवाको तयारी छ । तर, प्रदेश प्रमुख कसलाई तोक्ने भन्ने विषयले भने दुवै मधेसवादी दलमा विवाद सुरु भएको छ ।

ठाकुरले सिफारिस गरेका झा खिलराज रेग्मी सरकारमा मन्त्री बनेका थिए । ठाकुरले आफ्नी सम्धिनी इन्दा झालाई समानुपातिक सांसद र सम्धिनीलाई सांसद बनाउन लागेपछि राजपाभित्र तीव्र विवाद सुरु भएको छ ।

फेसबुकबाट तपाईको प्रतिक्रिया

comments