गाउँको मुहार फेर्दै पूर्वसैनिक

  • 131
  •  
  •  
  •  
  •  
    131
    Shares

सुरुङ्गा, झापा, २४ माघ । बाह्रदशी गाउँपालिका–३ का वीरेन्द्रप्रसाद राजवंशी जेठ १४ गते भएको स्थानीय तहको निर्वाचनमा नेकपा (एमाले)का तर्फबाट वडाध्यक्षका प्रत्यासी हुनुहुन्थ्यो ।

राजवंशी समुदायको बाहुल्य भएको सो क्षेत्रमा सहयोगी र लोकप्रिय भएकै कारण उहाँ निर्वाचित पनि हुनुभयो । राजवंशी अहिले त्यस क्षेत्रको विकास निर्माणको काममा अग्रसर हुनुहुन्छ । उहाँको जनप्रतिनिधिका माझ बेग्लै पहिचान छ । बेग्लै पहिचान हुनुको पछाडि उहाँको विगतको पेशागत संलग्नताको प्रमुख भूमिका रहेको छ ।

बाह्रदशी–३ का राजवंशी भद्रपुरस्थित मेची बहुमुखी क्याम्पसमा अध्ययनरत हुनुहुन्थ्यो । विसं २०४४ मा तत्कालीन शाही नेपाली सेनामा प्रवेश गर्नुभएका उहाँ २०५१ सालदेखि २०५५ सम्म नारायणहिटी राजदरबारको सुरक्षामा संलग्न हुनुभयो । त्यसको केही समयपछि उहाँ तत्कालीन राजा वीरेन्द्रको सुरक्षामा खटिनुभयो ।

नेपाली सेनाको हवल्दार मेजर पदमा रहेर उहाँले पूर्व राजाको सुरक्षासँगै नारायणहिटी दरबारको सेवाको अनुभव पनि लिनुभयो । विसं २०५५ मा सूर्यविनायकमा उहाँको सरुवा भएपछि दरबारबाट बाहिरिनुभएका राजवंशीले त्यसपछि पाँच वर्षमात्र नेपाली सेनामा काम गर्नुभयो ।

विगतको अनुभवले गाउँमा अहिले उहाँको बेग्लै पहिचान कायम भएको हो । योसँगै उहाँले राजवंशी शब्दकोष भण्डार तयार गर्दा राजवंशी भाषा अनुवाद समितिमा समेत रहेर काम गर्नुभयोे । राजवंशी शब्दकोष भण्डार अंग्रेजी र नेपालीमा समेत अनुवाद गरिएपछि उहाँ त्यस क्षेत्रमा मात्र नभई बाहिर पनि उत्तिकै लोकप्रिय हुनुहुन्छ ।

नेपाली सेनाको जागिर त्यागेपछि गाउँ फर्किनुभएका उहाँ अहिले गाउँलेको सेवामा सर्मपित हुनुहुन्छ । पन्ध्र वर्षसम्म सेनामा जागिरे जीवन बिताउनुभएका राजवंशीका लागि समाज सेवा नौलो थियो । सेनामा जागिरे हुँदा कालीबक्स गणअन्तर्गतको इञ्जिनियरिङ गणमा कार्यरत रहँदा धुन्चेदेखि सोमदाङसम्मको १०५ किलोमिटर सडक निर्माण र नौ महिनासम्म शैन्य तालीम केन्द्रमा रहँदा त्रिशूलीको सडक निर्माण गरेको सम्झदै उहाँले गाउँमै विकास निर्माणका काम अघि बढाउने निर्णय गर्नुभयो । अन्ततः उहाँ आफ्नै गाउँको मुहार फेर्न लागि पर्नुभएको छ ।

राजवंशीको अहिले पनि पहिलो काम विकास नै हो । उहाँ हरदम हर समय विकास निर्माणका काममा केन्द्रित रहनुहुन्छ । राजवंशीले सुनकोशी बचत तथा ऋण सहकारी संस्थाको पाँच वर्षसम्म अध्यक्ष पदमा रहेर काम गर्नुभयो । विकासको दृष्टिकोणले पछि परेको राजगढलाई नमूना गाउँ बनाउने सोचका साथ चुनावी मैदानमा होमिनुभएका उहाँ अन्तत सफल भएरै छाड्नुभयो ।

राजवंशीको अहिलेको पहिलो प्राथमिकतामा छ सडक निर्माण । सडक निर्माणसँगै विद्युतीकरण, सिँचाइको व्यवस्था, स्वच्छ खानेपानी र कृषकलाई व्यावसायिक कृषि प्रणालीमा लागेर आत्मनिर्भर बनाउनु नै हो । जंगली हात्तीको उपद्रोले राजगढवासीलाई आक्रन्त पारेपछि उहाँ अहिले अलमलमा पर्नुभएको छ । दिन प्रतिदिन हात्तीको उपद्रोका कारण राजगढवासीको धनजनको सुरक्षा कसरी गर्न सकिएला भन्ने ठूलो चिन्ता छ राजवंशीलाई ।

राजवंशी सबैका साझा नेता हुनुहुन्छ । दलगत स्वार्थभन्दा माथि उठेर उहाँले गाउँपालिका अध्यक्ष खड्गप्रसाद राजवंशीसँग मिलेर वडा नम्बर ३ को राजगढ बजारलाई स्मार्ट सिटी बनाउने अवधारणा अघि सार्नुभएको छ । गाउँपालिकाले सो कार्यका लागि रु एक करोड १० लाख बजेट विनियोजन गरेको छ ।

“राजगढ बजारलाई व्यवस्थित गर्न डिपीआर तयार भइरहेको छ,” उहाँले भन्नुभयो । रु १० करोड ६९ लाखको लागतमा फैंदारघाट सिँचाइ आयोजना तथा रु १६ करोडको लागतमा राजगढ खानेपानी आयोजना सञ्चालनमा छ । एउटा आर्थिक वर्षमा झण्डै रु ३० करोड बजेट एउटै वडामा भित्र्याएर विकास निर्माणका लागि देखाएको तदारुकताका कारण राजवंशी अहिले सबैका साझा नेता बन्नुभएको छ ।

फेसबुकबाट तपाईको प्रतिक्रिया

comments

Leaderboard Banner

Leave a Reply

Your email address will not be published. Required fields are marked *

47 − = 42