‘लम्फू’ निर्माता भन्छन दर्शकको प्रतिक्रियाले हामी सन्तुष्ट छौं

  • 158
  •  
  •  
  •  
  •  
    158
    Shares
काठमाण्डौ। शुक्रबारबाट प्रदर्शनमा आएको चलचित्र ‘लम्फू’ले दर्शकबाट राम्रो प्रतिक्रिया बटुलिरहेको बताईएको छ । प्रदर्शनको पहिलो र दोस्रो दिन भारतीय प्रधानमन्त्री नरेन्द्र मोदीको नेपाल भ्रमणका कारण र आइतबार नेपाल बन्द र झरीको कारण दर्शकको उपस्थिति हलमा ठेलमठेल नदेखिएपनि अन्य दिन भने राम्रो व्यापार रहेको निर्माता शक्तिबल्दभ घोरासैनीले जानकारी दिए ।
निर्माता घोरासैनी भन्छन्, ‘कलेक्सनले मात्र सफलताको मापन गर्दैन । हो, अपेक्षा अनुसार चलचित्रले व्यापार गर्न सकेन तर दर्शकको उत्कृष्ट प्रतिक्रियाले हामी सन्तुष्ट छौं । हाम्रो मेहनत बेकार गएन यो नै सबैभन्दा ठूलो सफलता हो ।’
‘लम्फू’को कथावस्तु र गीतसंगीतलाई दर्शकले औधि रुचाएका छन् । यस चलचित्रबाट डेब्यु गरेका कबिर खड्काको कामलाई पनि सबैले तारिफ गरेका छन् । निर्देशक गोपालचन्द्र लामिछाने ‘लम्फू’लाई दर्शकले रुचाएकोमा खुसी देखिन्छन् । ‘सत्तरी प्रतिशत दर्शकले निकै राम्रो चलचित्र बनेको प्रतिक्रिया दिनुभएको छ, बीस प्रतिशतले औषत प्रतिक्रिया दिनुभएको छ भने दश प्रतिशतले ठिकै रहेको प्रतिक्रिया दिनुभएको छ’ लामिछानेले बताए ।
‘लम्फू’मा कबिरका अलावा मरिश्का पोखरेल, सलोन बस्नेत, चाँदनी शर्मा, सञ्जित भण्डारी, कुशाग्र भट्टराई (बालकलाकार), आयन खड्का, ओम गुरुङ्ग, अजित लामिछाने, सन्तोष कार्की, कुशल गुरुंग, काजोल, रश्मी भट्ट, जानुका पौडेल, पुष्प आचार्य, झलक कार्की, थमन सिंह पुर्जा लगायतको अभिनय रहेको छ ।
यस चलचित्रमा तरकारीवालीको नामले संसारभर प्रख्यात कुशुम श्रेष्ठको पनि अभिनय रहेको छ । यो चलचित्रमा एक युवाको जीवनमा आईपर्ने विभिन्न उतारचढावको कथा समेटिएको छ ।
प्रचार-प्रसारको समयमा परिक्षाको कारण उपस्थित हुन नसकेकी तरकारीवाली पत्रकारसँग चलचित्र हेर्न भने हल पुगेकी थिइन् । उनि आगामी शनिवार काठमाण्डौका केहि हलहरुमा दर्शक भेट्न जाने बताएकी छन् ।

फेसबुकबाट तपाईको प्रतिक्रिया

comments

Leave a Reply

Your email address will not be published. Required fields are marked *

+ 12 = 16